Langyaw'ng turista midagsa

CEBU, Philippines - Gipaabot nga modagsang ang mga langyaw sa mosunod nga mga adlaw alang sa pagsaksi sa Sinulog festivities atol sa tinuig nga pangilin ni Sr. Sto. Niño.

Ang nagkadaiyang dapit sa Sugbu dunay mga giandam nga mga kalingawan ug kalihukan gawas pa sa relihiyosong kalihukan sa diha Basilica Del Sto. Niño nga dili lang hugopan sa mga debotos kundili nahimo na usab nga atraksyon sa mga langyaw.

Ang buhatan sa Bureau of Immigration (BI) nakatala og 50,139 ka mga langyaw nga nangayo og lugway sa ilang pagpuyo dinhi sa Sugbo sa bulan pa lamang sa Nobiyembre sa tuig hangtud karong tuiga.

Sa paghatag og lugway sa maong mga langyaw gikatahong mikita ang gobiyerno og P22,558 milyones gikan sa ilang gibayad.

Matud pa sa BI nga dinhi sa Visayas kapin sa 7,000 ka mga langyaw ang permanente nang nagpuyo dinhi nga naglakip sa mga naminyo ug nakabaton og negosyo dinhi.

Dugang nasayran nga dinhi sa Sugbo sukad sa bulan sa Enero hangtod sa Nobiyembre 30 sa miaging tuig maoy natala ang 507, 935.

Nag-una gihapong mga turistang miduaw dinhi sa Sugbu mao ang gikan sa nasud sa South Korea nga may gidaghanong 168,193 ug gisundan kini sa Hapones nga 59,981, Taiwanese 27,437, Chinese 26,908, Amerikano 26,027 ug uban pa. – BANAT NEWS