Eskina mohata'g balay sa mga kabus

CEBU, Philippines - Nagplanong mopalabang og balaudnon si congressional aspirant Rene ‘r.e’ Espina kun palaron sa ikaunom nga distrito sa lalawigan sa Sugbu ang Mass Housing Program alang niadtong mga kabus nga walay klarong pinuy-anan lukop nasud ilabina diha sa ikaunom nga distrito.

Matud ni Espina ang maong programa dako og kalainan sa programa sa nasudnon ug lokal nga mga housing programs sanglit kini mas hamugaway ug environment friendly.

Si Espina nga usa ka international economist nga nagtuon ug nakigtrabaho sa tulo ka mga Nobel Laureates sa Economics nga sila si James Tobin, Wassily Leontieff ug Tjalling Koopmans, nagkanayon nga ang maong balaudnon mokober dili lang sa mga tawong nanginahanglan og panimalay kay sakopon usab niini ang mga pabrika sa housing materials.

Sumala pa niya nga ang tubig sa kabalayan nga nagamit na ma-recycled, ang methane gas sa pansayan kuhaon ug gamiton isip alternatibo sa liquefied petroleum gas (LPG) aron magamit sa matag panimalay sa ilang pagluto.

 Si Espina miingon nga ang mamuyo sa mass settlement, adunay kahigayonan nga mabansay subay sa programang iyang gitinguhang mahimo nga Pride Program (Ibalik ang Garbo sa Sixto Distrito) diin makat-unan ang mga teknikal nga trabaho aron makatrabaho sa laing nasud.

Pinaagi usab sa mass settlement mas monindot ang komunidad, mas mokita ang gobiyerno ug ang kitaon adto mahapak sa health services ug panginahanglan sa mga kabus.

Dugang pa niya nga sa institusyonal nga sector, paubsan ang interes sa mopahimo og balay tungod kay himuong investment vehicle ang pagpalit og mga house and lot bonds nga tax free maong gipanglantawan niyang ilogan kini sa mga developers ug bisan na sa sektor sa gobiyerno.

Sa sinugdanan, buot niyang adto himuon ang unang housing program sa lungsod sa Consolacion tungod kay mas barato ang kantidad sa yuta kun itandi sa dakbayan sa Mandaue sanglit grabe na kadaghan ang namuyo ug wala nay bakanteng luna nga katukoran niining maong programa.

Matud ni Espina ang mga kabus nga dili gyud mobiya sa ilang pinuy-an ngadto sa gitukod niyang kabalayan sa lungsod sa Consolacion, magtukod nalang siya og 20 ka andanang balay nga anha papuy-an sa mga kabus. (Rey Pasaporte)   (BANATNEWS)