2 'tulisan' nasikop sa checkpoint

CEBU, Philippines - Duha ka gituohang tulisan ang nasikop sa taga Criminal Investigation and Intelligence Branch (CIIB) sa gipahigayong checkpoint sa miaging gabii sa dalan E. Chavez barangay Lorega.

Ang nasikop mao sila Dennis Tibon, 22, sa Pagsabungan sa syudad sa Mandaue ug Ernesto Arrega, 30, taga dalan Martinez syudad sa Sugbo.

Si PO2 Marlon Perolina nga usa sa nag-checkpoint nakamatikod sa duha ka lalaking nagdali og kanaog sa usa ka pasaheroan pipila ka metros sa dili pa maabot sa checkpoint.

Tungod niini si Perolina uban sa BIN ug sa laing polis daling misunod sa duha ka lalaki nga nagdali-dali og lakaw palayo sa maong lugar ug dihang ilang naabtan ug girekisa nakuhaan si Tibon og usa ka kalibre   .38 rebolber nga snub nose nga adunay lima ka buhing bala samtang nakuha usab sa kamot ni Arrega ang usa ka “double blade” nga kutsilyong 16 pulgadas ang gitas-on.

Ang duruha gidudahang maoy mga responsable sa pipila ka mga pagpanulis sa maong dapit.   (Lesley Caminade)