Gitangkugo pagpusil

CEBU, Philippines - Gipusil patay ang usa ka lalaki samtang nagsusi sa iyang mga manok igtatari sulod sa compound sa ilang pinuy-anan sa sitio Dapdap barangay Poblacion-III siyudad sa Carcar niadtong Biyernes sa alas 9:30 sa gabii.

Ang biktima nga patay nang nadangat sa tambalanan mao si Julius Amistad Panugaling, 29, molupyo sa nahisgutang lugar, samtang ang suspek wala pa gyud matumbok sa kapulisan sa paghimo ning balita.

Matod ni PO3 Jeovelle Bacarisas sa Carcar City Police dihang nahinabi sa Banat News mibutyag nga ang biktima mao pay pag-abot sa balay ug nanghipos sa iyang manok igtatari nga gilansad.

Samtang gibuhat niya kini kalit nga mibutho ang wala mailhing tawo dayon mipusil kaniya samtang nagtalikod ginamit ang kalibre 45 pistola diha sa luyong bahin sa ulo.

Ang silingan sa biktima nga si Lucio Villaesquera mibutyag dihang gisukit-sukit sa kapulisan nga sa wala pa ang hitabo nakadungog siya og singgit sa biktima nga nagkanayon nga “ayaw brod ayaw brod!” dayun gisundan sa sunod-sunod nga buto sa armas.

Dihang gisusi niya diin gikan ang buto nakita nalang niyang nagbuy-od na sa gawas nga bahin sa barangay road ang biktima nga naglunang sa kaugalingong dugo ug wala nay kinabuhi hinungdan nga gi-report dayun niya sa kapulisan.

Ang mga polis nay mihatud kaniya sa Carcar City District Hospital apan gideklarar kining dead on arrival.

Samtang ang kapulisan padayun pa sa ilang imbestigasyon pagtumbok ug pagsikop sa mamumuno nga pabilin pa karung gawasnon ingon man pagtino sa motibo sa krimen.   (Darrel Carumba ug nila ni Guamitos Logroño ug Raymond D. Abarcas UV Journalism Intern)    (BANATNEWS)