Nakuryentihan ibabaw sa billboard

CEBU, Philippines - Napaig ang tibuok lawas sa usa ka tawo human kini makuryentihe sa usa ka wire sa Mactan Electric Company samtang nagtubag sa cellphones atol sa pagbutang og billboard sa barangay Mactan dakbayan sa Lapulapu kagahapon sa udto.

 Ang biktima nga gidali pagdala sa tambalanan giilang si Joel Macachor, 36, lumad sa Bulokbulok, Barili ug kasamtangang nagpuyo sa sitio Soong sa Mactan dakbayan sa Lapulapu.

 Ang Banat News nga daling nakaabot diha sa gihitaboan nakakita sa biktima nga si Macachor nagbitay nalang sa usa ka billboard nga adunay gitas-on nga 25 ngadto sa 30 ka tiil ang gitas-on.

Nawad-an na kini og kusog gumikan sa pagkakuryente sa usa ka linya sa koryente sa MECO diha duol sa gitaod nilang billboard.

Usa ka Jessil Genes ug Richard Quijano nga mga kauban sa biktima mitug-an sa Banat News nga gisugo sila sa management sa Sto. Niño Mactan Montessori School Inc. sa barangay Mactan nga itaod ang ilang dakong tarpoline sa maong billboard nga nahimutang sa maong dapit.Matud pa ni Genes nga daan na siyang nakamatikod nga ‘grounded’ kun may gamayng kuryenteng naglatay sa puthaw nga kaha sa maong billboard hinungdan nga dali siyang mikanaog.

Apan mipadayon si Macachor sa pagsaka ug pag-abot niini sa ibabao nga bahin sa maong billboard mikuot kini sa iyang cell phone kay adunay gitubag.Gumikan niini wala makabantay si Macachor nga duol na siya sa main line sa MECO kansang poste nagsikit sa billboard hinungdan nga sa pagbag-id sa ulo niini ngadto sa maong wire nakuryentihan kini.

Bisan pa sa nahiagumang paso sa tibuok kalawasan sa biktima nakahimo pa kini sa pagsab-it sa iyang t-shirt ngadto sa usa ka puthaw sa maong billboard aron dili siya mahulog.Ang maong kauban niini daling nakapangayo og tabang ug giputol sa mirespondeng sakop sa MECO ang linya sa kuryente apan milanat pa og usa ka oras una makuha sa Emergency Rescue Unit Foundation ug Bureau of Fire Protection rescue team ang biktima ug gidali og dala sa tambalanan.

Matud pa ni SPO3 Rex Ibañez sa Crime Against Person desk sa kapolisan sa Lapulapu nasunog ang tibuok lawas ni Macachor gumikan sa kakusog sa kuryenteng milatay sa lawas niini nga nakawala usab sa iyang kusog. Ang biktima padayon pang giobserbahan sa mga doktor atol ning pagsulat sa balita.   (BANATNEWS)