Market collector naghikog

CEBU, Philippines - Usa ka market collector nagbitay nga patay na sulod sa iyang lawak didto sa barangay Poblacion, lungsod sa Dalaguete sa miaging adlaw.

Ang naghikog pinaagi sa paghigot og pisi sa iyang liog, giila nga si Alma Cabungkay, 38, minyo, usa ka kolektor sa merkado sa Dalaguete, kinsa temporaryong nag-abang sa nahisgutang lugar apan lumad nga taga barangay Caliongan, lungsod sa Dalaguete.

Si PO2 Maximo Belcenia, duty nga polis sa Dalaguete Police Station nga nahinabi sa Banat News kagahapon mibutyag nga ang nakadiskobre sa biktima nga wala nay kinabuhi mao ang iyang igsoong babaye.

Gani nakuha sa kapolisan ang pisi nga gigamit sa biktima sa iyang paghikog pinaagi sa pisi kansang pikas tumoy gigaid sa kisame sa balay nga gipanag-iya ni Prima Magallanes.

Gisuwayan pa kini og hatud ngadto sa Alcantara District Hospital apan gideklarar kini nga patay na gyud sa paghiabot didto.

Matud pa ni PO2 Belcenia nga ang biktima usa ka municipal collector sa merkado sa Dalaguete ug giingong aduna kini personal nga problema. – BANAT NEWS