Kiha batok polis naa na sa Napolcom

CEBU, Philippines - Ang mga ginikanan sa unom ka bata giingong gipayarok og bino sa usa ka polis, pormal nang miduso sa ilang reklamo niadtong Huwebes sa buntag ngadto sa National Police Commission (NAPOLCOM) batok sa nahisgutang polis.

Si Atty. Ronnie Oriol, information officer ug provincial officer sa Cebu South NAPOLCOM mibutyag sa Banat News nga kasong administratiba ang atubangon ni PO3 Noel Monares.

Si Monares anaa idestino karon sa Regional Intelligence Unit (RIU) sa Provincial Regional Office (PRO)-7.

Matud ni Oriol nga nadawat na nila ang mga apidabit sa mga bata busa andam na sila sa pagpahigayon og pre-charge investigation kabahin sa insidente.

Gipasabot ni Oriol nga sulod sa tulo ka adlaw gikan niadtong Huwebes padad-an nila og kopya sa apidabit sa mga bata si Monares aron mahatagan kini og higayon nga makatubag sa pasangil batok kaniya.

Gisuta usab sa NAPOLCOM kun wala ba makapasaka kining maong reklamo ngadto sa Internal Affair Service (IAS) ug sa People Law Enforcement Board (PLEB).

Kini tungod kay matud pa ni Oriol nga ma-dismiss sa NAPOLCOM kining maong reklamo sa mga biktima kun gisang-at usab kini nila ngadto sa nahisgutang mga ahensiya o buhatan , tungod kay adto ra man gihapon kini ihandos sa maong mga ahensya sa ilang buhatan, matud pa ni Oriol.

Si Oriol midugang nga base sa ilang pakisusi, ang nahisgutang reklamo maoy unang kiha batok kang Monares nga naduso diha sa ilang buhatan ug kun mapamatud-an nga nakabuhat kini og “grieve misconduct” nga kalapasan, posibleng mapalagpot sa serbisyo ang maong polis.

Kahinumdoman nga si Monares giingong miimbitar sa unom ka mga minor de edad atol sa birthday party sa iyang anak sa miaging buwan ug mipainom og ilimnong makahubog kanila apan ang maong pasangil gihimakak sa nahisgutang polis. – BANAT NEWS