Bucao nanumpa isip bise mayor sa Talisay

CEBU, Philippines - Pormal nang mihural sa katungdanan si acting vice mayor Alan Bucao isip bise mayor hulip kang kanhi Bise Mayor Lani Abarquez sa dakbayan sa Talisay kagahapon sa buntag.

Kini human usab sa opisyal nga pagluwat ni Abarquez sa maong katungdanan dili pa dugay.

Si Kongresista Eduardo Gullas sa unang distrito sa lalawigan sa Sugbo, maoy mipahural kang Bucao didto sa iyang buhatan nga gitambungan sa tanang mga opisyales sa dakbayan sa Talisay gawas kang konsehal Shirley Belleza.

Kahinumdoman nga si Belleza ug Bucao kinsa suod kaayong magkauban sa katungdanan gawas sa ilang panaghigala, apan nahimong higpit nga magkaribal sa eleksiyon niadtong tuig 2007 ug gani nagkasinukliay pa kini og mga mahait nga pulong.

Si Bucao kinsa maoy unang kasuod ni Kongresista Gullas maoy mihimo og dalan aron ang magtiyaong Belleza mahimo usab nga suod sa kongresista kaniadto.

 Ug sa pagkakaron si kanhi Bise Mayor Aberdovey Belleza , kinsa maoy bana ni konsehal Shirley maoy higpit nga kaatbang ni Bucao sa pagka-bise mayor nga kandidatura sa Talisay, kini tungod sa kapakyas ni Belleza sa pagtuman sa ilang gikasabutan tali ni Kongresista Eduardo Gullas ug ni Bucao.

Si Bucao nga nahinabi sa Banat News kagahapon nagkanayon nga posibleng aduna lay importanteng gilakaw si konsehal Shirley Belleza   hinungdan nga wala kini makatambong sa iyang paghural.

Apan ang konsehala sa iyang bahin nagkanayon nga wala siya imbitaha sa maong kalihokan hinungdan nga wala siya motunga didto.

Hinuon giangkon niya nga wala siyay kayugot kang Bucao ug gani mipadayag pa kini sa iyang mga pahalipay ngadto sa bag-ong bise mayor.

Ug gidayeg usab niini ang mga katakos ni Bucao sa paghulip isip acting vice mayor tungod kay iyang nakita ang mga kaayohan nga nabuhat niini.

Si Bucao usab sa iyang bahin, nagkanayon nga padayonon niya ang iyahang nasugdan nga mga kalamboan dihang acting vice mayor pa siya sa siyudad.

 Usa sa iyang tumong mao ang pagpanday og mga balaodnon alang sa kaayohan sa siyudad.   – BANAT NEWS