Cortes ug Ruiz nagkasabot na sa proyekto

CEBU, Philippines - Nagkauyon na ang duha ka mga dagkong opisyal sa dakbayan sa Mandaue nga hiusahon nalang ang pagtrabaho sa kontrobersiyal nga proyekto sa dalan R.T Colina sa barangay Ibabao dakbayan sa Mandaue.

Kini human sa panagtagbo nila ni 6th District Kongresista Nerissa Soon-Ruiz ug Mandaue City Mayor Jonas Cortes atubangan ni Ombudsman Visayas Assistant Deputy Director Virginia Palanca Santiago kagahapon.

Ang Ombudsman mitambag kanila nga padayunon ang maong proyekto ug magtinabangay nalang ang Department of Public Works and Highways ug City Engineering Office sa dakbayan sa Mandaue.

Matud pa ni Cortes nga mas maayo nga ang DPWH ug si City Engineer Engr. Antonio Sanchez maoy maglingkod alang sa pagpadayon sa maong proyekto nga ang gahin sa dakbayan sa Mandaue ug ni Ruiz sa iyang PDAF alang sa maong proyekto hiusahon nalang.

Nauyonan sa duha nga ang orihinal nga 74 metros nga proyekto himuon nalang nga 200 metros tungod kay duha ka pundo naman ang magamit nga gahin.

Si Ruiz sa iyang bahin nagkanayon nga kun gitubag palang dayon sa dakbayan ang ilang suwat niadtong Hulyo sa milabay’ng buwan dili na maingon niini ang nahitabo, hinuon nalipay siyang magpadayon kini bisan sa gamay’ng kalangay.

Si Santiago mipasidaan sa duha ka habig nga kinahanglan nga anaa kanunay ang koordinasyon sa mga proyekto nga himuon ug gipahimangnoan ang dakbayan sa Mandaue nga tubagon dayon ang bisan unsang komunikasyon nga ihatag ngadto kanila.

Gipahinumduman ni Santiago ang mga opisyal nga adunay silot sa balaod ang bisan kinsang magdumili sa pagtubag sa usa ka komunikasyon nga giduso ngadto sa lokal nga kagamhanan. - Bong Soriano (BANAT NEWS)