49 anyos naproblema's utang naghikog

CEBU, Philippines - Problemang pinansiyal alang sa utang ug ang giingong nervous breakdown ang gituuhang hinungdan sa pagpakamatay sa usa ka amahan o sa Purok Kalabasa, sitio Carajay, barangay Gun-ob dakbayan sa Lapulapu kagahapon sa buntag.

Ang nagpakamatay mao si Esmeraldo Arriesgado Orongan, 49, (dunay ka live-in ug may pito ka anak) residente sa maong dapit ug usa ka construction worker.

Sa imbestigasyon nila ni Insp. Manruf Bantug ug PO3 Dioscoro Arong sa Crime Against Person Desk nasuta nga si Rosalie dela Cruz (kalive-in ni Orongan) maoy unang nakakita niini nga nagbitay na sulod sa ilang lawak gamit ang usa ka t-shirt nga gihikot ngadto sa kisame sa ilang panimalay.

Ang kapolisan nakakuha o tulo ka suicide notes gikan ni Orongan nga nagpahibalong dako siya og problemang pinansiyal. Giingong sa milabay’ng mga adlaw namatikdan kining nagsige og panganti nga magpakamatay nalang.

Matud pa ni dela Cruz ngadto sa kapolisan nga usa sa problema ni Orongan ang bayranan sa mga appliances nga iyang giutang nga gibaligya niini nga wala pa maimpas sa mga giutangan niini.

Gumikan kay ang trabaho dili kanunay nagproblema kini sa mga tawong magsige og paningil ug gituuhang naaburido kini ug nagpakamatay.

Sa pagsusi sa kapolisan walay nakitang foul play sa kamatayon ni Orongan gani ang igsuon niini ug mismo si dela Cruz kombinsidong naghikog gyud kini. - Bong Soriano (BANAT NEWS)