6 mil ang mobantay sa Grand Mardi Gras

CEBU, Philippines - Moabot sa 6 mil ka mga polis, sundawo, civilian volunteers, lakip na sa mga estudyanteng kadete ang molangkob sa crowd control sa umaabot nga Sinulog 2010.

Kini maoy gibutyag ni Konsehal Augustus Pe Jr., nga maoy co-chairman sa crowd control committee alang sa nahisgutang kalihukan.

Nagtoo ang konsehal nga mas lisod kontrolahon ang mga tawo nga mosaksi sa Sinulog grand parade kung minos ang mga contingents nga mosalmot.

Una nang napanglantawan sa Sinulog Foundation nga mas minos ang mga contingents nga mosalmot sa nagkaduol na nga Sinulog 2010 ug tungod niini hugot nga pagpangandam himuon sa crowd control committee nunot sa ilang napanglantawan nga sitwasyon.

“It’s possible that it’s going to be a little difficult to control the crowd this time considering that there might have not enough contingents, that means, there’s a lot of lull times unya ang mga tawo become unruly, manugat sa contingents, manglakaw sa carousel route, so, that makes it tough for the crowd control group,” sumala pa ni Pe.

Lakip sa nahuna-hunaan sa crowd control committee mao ang pagpalit ug mas taas nga pisi nga mosubra pa sa gikinahanglan sa 7 ka kilometro nga parade route.

Kagahapong adlawa, gipatawag ni Sinulog Foundation ug Bise Mayor Michael Rama ang usa ka multi-sectoral meeting nga maoy mopatuman sa seguridad ug kahapsay sa Sinulog nga langkuban sa kapulisan, militar, mga kapitan sa mga barangay nga maagian sa carousel route ug uban pa.

“If unruly situation will occur at the carousel route, no contingents will reach the area, so, that’s how important the crowd control,” nagkanayon si Rama. - Elly Bolonos (BANAT NEWS)