Liboan miapil alang sa Walk With Jesus

CEBU, Philippines - Liboan ang mitambong sa malinawon nga pagpahigayon sa ‘Walk with Jesus’ kagahapong adlawa nga naggikan sa Fuente Osmeña padulong sa simbahan sa Basilica del Sto. Niño nga gisugdan pasado alas-4 sa kaadlawon.

Ang Santos nga Misa giselebrar sa rector sa maong simbahan nga si Fr. Rodolfo Bugna nga gitambongan sa 36 ka pari lakip na niini si Bishop Christian Noel sa Diocese of Talibon ug Monsenyor Cayetano Hilbolingo.

Dungan sa unang misa, gibendisyonan sa Rector sa Basilica del Sto. Niño ang Hermano Mayor ug Hermana Mayor sa Pista Señor 2010 nga sila si Dr. Jose "Dodong" Gullas ug kapikas niya nga si Nena.

Si Fr. Bugna sa iyang wali nga milanat og 30-minutos, mihagit sa mga politiko, kapari-an, media ug ang katawhan nga kanunayong hinumduman si Sr. Santo Niño paghatag og bili.

Lakip na sa gihagit ni Bugna ang kabataan nga batasanon ang pag-ampo ug pagkanta sa kantahong simbahan tungod kay sagad kanila karon mas dako ang panahon sa mga kalingawan ug diyutay nalang gani ang manimba ug kung motambong man lahi ang ilang katuyoan.Mihangyo usab si Fr. Bugna sa katawhan nga ilisan na ang bati nga kinaiya ug pulihan kini og kaayo ug kabahin sa umaabot nga eleksyon giawhag niini ang publiko nga di mobaligya sa ilang mga botos.

“Palihug wala nay vote buying,” pulong pa niini ingon man ang panawagan sa katawhan nga dili magmakuli pagtabang sa nanginahanglan.

Sa pakighinabi sa Banat News ni Fr. Bugna miangkon siyang mas daghan ang mga tawong mitambong kun itandi sa miaging tuig, mao usab kini ang iyang namatikdan sa mga nagkadaghang debotos ni Senior Santo Niño.

Gihulagway usab ni Fr. Bugna nga swerte ang pagsaulog nila sa ilang ika-444 ka tuig sa Sinulog sa Simbahan tungod sa tulo ka kwatro apan ang mas labaw nga nagahatag og swerte sa simbahan mao ang pagkahugot sa pagtuo sa mga katawhan.

Samtang si Chief Insp. Arnel Banzon, hepe sa Fuente Police Station, nga maoy ground commander sa pagpahigayon sa prusisyon nagkanayon nga iyang gikonsiderar nga malinawon ang nahitabong prusisyon ug wala silay nadawat nga mga report nga adunay nakuotan ug nawad-an og butang. – BANAT NEWS