CEBU, Philippines - Mopatuman na usab og traffic rerouting ang Cebu City Traffic Group uban sa City Traffic Operations and Management (Citom) karong adlawa tungod sa Sinulog 2010 launching parade nga manukad gikan sa Basilica del Santo Niño paingon sa Fuente Osmeña, patighulog sa Cebu City Sports Center (CCSC).
Ang maapektahan sa rerouting mao kadtong mga sakyanan partikular na sa mga jeep de pasaheroan nga mag-agian sa Osmeña Boulevard.Mobalik ra hinuon ang normal nga rota ilabi na sa mga PUJ kung mahuman na ang nahisgutang kalihukan nga magsugod sa alas-dos ang takna karong hapon.Sa susamang kalamboan, laing traffic rerouting usab ang ipatuman sa Traffic Group ug Citom ugmang adlawa ingon man sa adlaw'ng Domingo subay usab sa pagpahigayon sa Sinulog sa Kabataan sa Lalawigan ingon man sa Sinulog sa Kabataan sa Dakbayan.Ang Sinulog sa Kabataan sa Lalawigan ugmang adlawa manukad sa Capitol Site agi sa Osmeña Boulevard paingon sa CCSC ug mobalik sa normal ang rota kung mahuman na ang nahisgutang kalihukan nga magsugod sa alas-12 sa udto.
Samtang ang Sinulog sa Kabataan sa Dakbayan unya sa Domingo, manukad sa Plaza Independencia subay sa Osmeña Boulevard lahos na sa CCSC.Subay niini, ang Traffic Group ingon man ang Citom mipahimangno sa mga motorista nga sundon lang ang mga traffic signs nga ipakatap sa kadalanan aron dili mahasol.
Mahibalik ra hinuon gihapon ang naandang rota ilabi na sa mga jeep de pasaheroan, kung mahuman na ang parada sa tanang mga contingents. – BANAT NEWS