Mga casual 'gigamit' lang

CEBU, Philippines - Kusganong gipanghimakak sa buhatan ni Gobernador Gwendolyn Garcia ang pasangil ni Gobernador Gregorio Sanchez nga gipang-terminate ang 57 niini ka mga casual ug contractual employees pinaagi sa wala na pag-renew sa ilang mga kontrata karong tuiga.

 Si Provincial Atty. Mariano Martinquilla, ang chairman sa gitukod nga Casual on Sourcing and Outsourcing Committee, nga dili 57 ka mga empleyado kun dili 56 lamang ka mga casual ug contractual employees ang gi-destino sa buhatan sa bise gobernador ug ubang mga provincial board members .

Si Martinquilla nagkanayon nga sa 56 ka mga empleyado, 30 lamang ang nadestino sa buhatan ni Sanchez, ug pito lang sa maong mga casual ug contractual employees ang dili na ma-renew samtang ang uban gi-rekomendar nga ma-renew.

Sumala pa niini nga may nadawat silang report nga ang pito nga dili na ma-renew nagdawatan og suweldo sa Kapitolyo apan atua magtrabaho sa organic farm sa lungsod sa Tuburan ug fish pond sa lungsod sa Tabuelan nga gipanag-iya sa bise gobernador.

 Sila mao si Lolita Yaon, Joyce Tabutabo, Edilberto Drilon, Crisy Jane Eman, Manuel Montebon, Rodulfo Montebon ug Elmer Batelia matud pang Martiquilla.

 “Ato una silang hatagan og igong higayon nga makahatag og explanation sa committee kun nganong angayan pa nga ma-renew ang ilang mga kontrata,” matud pa ni Martinquilla sa press conference kagahapong adlawa.

 Kun mapamatud-an sa komitiba ang maong report, ilang irekomendar sa gobernador nga dili na pirmahan ang ilang kontrata alang sa tuig 2010 tungod kay gilapas na nila ang ilang milabay'ng kontrata pinaagi sa pag-alagad sa pribadong negosyo ni Sanchez ug dili sa public office.

Samtang si Capitol Consultant on Information Atty. Rory Jon Sepulveda nagkanayon nga wala gi-single out sa gobernadora si Sanchez tungod lamang kay mitapon kini ngadto sa kontra politika. Gipasabot niini, nga dili lamang ang kontrata sa casual ug contractual workers sa buhatan sa bise gobernador ang gi-review sa komitiba kundili apil na usab ang executives ilabi na sa Provincial Engineering Office nga wala mahatagi og rekomendasyon nga ma-renew ang kontrata tungod sa dili maayong performance.

Sigon pa ni Sepulveda nga hunahuna lamang ni Sanchez ang gipangangkon niining political harassment sa gobernadora ngadto kaniya tungod kay naandan nang proseso nga mag-review ug i-renew ang kontrata matag upat ka bulan sa mga kawani gawas lang sa tuig 2009 kay gihimo nila kining usa ka tuig.

Apan giklaro niini nga dili na gyud mahimong ma-renew pa ang kontrata sa siyam ka mga consultant sa bise gobernador tungod kay gikuha sa gobernador ang delegated executive function ni Sanchez tungod kay dili na madayon ang trans-axial highway project.   – BANAT NEWS