Tulisan nasubay kay kauban mitug-an

CEBU, Philippines - Duha ka lalaki, usa kanila suspetsadong tulisan ang nadakpan sa gipahigayong checkpoint sa mga polis sa Talisay City Police Station diha sa barangay Tabunok ug laing usa ka giingong kaubang tulisan ang nasikop sa follow-up operation diha sa lungsod sa Minglanilla niadtong Miyerkules sa gabii.

Ang nasikop sa check point mao sila si Gino Claros, 23, taga sitio Nazarette, barangay Tungkop, lungsod sa Minglanilla ug Rudy Lex Briones, 27, sitio Bacay, barangay Tulay sa samang lungsod ug Ronald Villanueva alyas “Isagani”, 21, taga sitio Pinggan sa nahisgutan usab nga lungsod.

Si PO2 Leandro Azarcon nga apil sa follow-up operation nga nahinabi sa Banat News kagahapon mibutyag nga si Briones ug Villanueva ang gitumbok ni Eliza Gonzales, 40, nga maoy milabni sa iyang bag nga P15,000 mga ID ug ATM card nga gibutang niya diha sa box likod sa iyang motorsiklo niadtong Disyembre 31, 2009 sa buntag diha sa Tabunok.

Si PO2 Roy Lofranco mibutyag sa Banat News nga si Claros nasakmitan og usa ka kutsilyo, usa ka kalibre .38 revolver nga dunay duha ka buhing mga bala.

Matud ni Lofranco nga natiman-an ni Gonzales ang mga nawong sa tulisang nagmotor mitupad sa ilang motorsiklo human siya mo-withdraw sa ATM ug milabni sa bag nga gisudlan sa kwarta.

Ang kapolisan gikuyogan ni Briones miadto sa balay ni Villanueva diha sa lungsod sa Minglanilla hinungdan sa pagkasikop niini ug nakuha ang cellphone ug assorted cards nga gipanag-iya ni Diecebel Tabar, nagkalain-laing lady’s wallet, ATM ug ID cards apil na ang kang Gonzales.  - Brenda Batuto uban ni Raymond Abarcas (BANAT NEWS)