Nakuryentihan sa manokan patay

CEBU, Philippines - Patay ang usa ka 21-anyos nga boy sa usa ka poultry farm human kini aksidenteng nakuryentihan sulod sa poultry nga iyang gitrabahoan sa barangay Maricaban lungsod sa Sta. Fe isla sa Bantayan niadtong Miyerkules sa alas 6:00 sa gabii.

Ang namatay mao si Allen Illustrisimo, 21, nagtrabaho sa Despi Poultry Farm sa maong lugar ug lumad nga taga barangay Hilantagaan, Sta. Fe.

Matud ni PO1 Jolimar Gilbuena sa Sta. Fe police dihang nahinabi sa Banat News nakadawat og tawag sa telepono ang ilang buhatan nga nagpahibawo sa usa ka tawo nga nakuryentihan sa maong poultry farm.

Ang kapulisan uban si municipal health officer Rowena Manalili miadto sa dapit apan ang naulahi mideklarar nga patay na si Illustrisimo kansang patay’ng lawas milagom na.

Matud pa sa inisyal nga nakuhang kasayuran sa kapolisan naglawog sa mga manok si Illustrisimo dihang gituuhang kini nakuryentihan, ang mga tangkal sa manok gibutangan og suga aron bisan gabii makakaon. - Darrel Carumba (BANAT NEWS)