Gubot sa Ibabao, Mandaue mi-init

CEBU, Philippines - Nagka-init ang politika sa dakbayan sa Mandaue sa dihang kagahapon sa udto mitumaw gyud ang tensiyon sa dalan R.T. Colina, barangay Ibabao-Estancia, dakbayan sa Mandaue gumikan sa proyekto nga gipatuman ni Kongresista Nerissa Soon-Ruiz nga gipahunong ni Mayor Jonas Cortes.

 Kini nahitabo sa dihang nagkaabot silang Soon-Ruiz ug Mandaue City Administrator Briccio Boholst nga gisugo ni Cortes pagpaundang sa concreting project sa naasoy’ng karsada nga gisugdan sa Department of Public Works and Highways.

Nagsugod ang tensiyon sa dihang gipakanaog ni Boholst ang operator sa backhoe nga nagkubkob sa karsada.

Sa iyang bahin, si Soon-Ruiz mitawag sa mga opisyal sa National Police Commission (NAPOLCOM) aron pagpakuha sa police line nga gipabutang ni Cortes sa palibot sa backhoe. Dali usab miabot ang mga sakop sa SWAT sa Mandaue City Police Office nga maoy mibutang sa police line hinungdan nga nasugdan og pipila ka gutlo ang proyekto ni Soon-Ruiz.

Matud pa ni Soon-Ruiz atol sa press conference nga kumpleto sila sa pagpahibalo ngadto sa buhatan sa mayor ug sa DPWH nga adunay umaabot nga proyekto sa maong dapit niadto pang bulan sa Oktobre 2009 nga naglakip sa pagpaayo sa dalan R.T. Colina, Ibabao-Estancia, Mandaue nga mokantidad og P500 mil base sa budget sa Special Allotment Release Order (SARO No. A-09-06210) sa Department of Budget and Management.

Gipakita usab ni Ruiz ang kopya sa Committee on Finance report sa konseho sa dakbayan sa Mandaue pinaagi ni Konsehal

Emiliano Rosal niadtong Disyembre 10, 2009 nga nagbasura sa P2 milyones nga gipangayo ni Cortes pagpaayo sa susamang dalan nga gisugdan na sa pag-ayo sa DPWH nga ang kontraktor niini mao ang V.O Chupuico Construction.

Matud pa ni Boholst nga daan na nilang gipahibalo ang DPWH nga dili ipahinayon ang proyekto sa R.T. Colina gumikan sa plano sa Mandaue nga mohimo usab sa susamang rehabilitasyon sa maong dalan.

Gipasabot ni Boholst nga bisan pa nga gibasura ang budget nga gipangayo ni Cortes ngadto sa konseho apan sa 2009 annual budget sa Mandaue nalakip sa P10 milyones nga budget ang road maintenance nga naglakip ang pagpaayo sa dalan R.T Colina.

Samtang gibasol ni Mandaue City Engineer Antonio Sanchez ang DPWH sa pagpatuman sa maong proyekto.

Matud pa niya nga niadtong Nobiyembre 16, 2008 gipahibalo niya ang DPWH nga ang Mandaue adunay drainage project sa R.T. Colina.

Gumikan sa maong tensiyon nakahukom ang duha ka habig sa paghilom ug milain sa panagtagbo tali sa mga abogado sa isig ka habig alang sa pagresolbar sa maong tensiyon.

Matud ni Atty. Gonzalo Malig-on, chief of staff ni Soon-Ruiz nga andam silang makigsabot aron mahuman ang proyekto ug andam usab sila nga makigdungan sa pagpatuman niini gumikan kay dili sila makatugot nga ang katawhan sa Mandaue ilabi na ang mga motorista maoy mahasol unya sa proyekto.

Sa pagbiya sa R.T. Colina, nagkahiusa ang duha ka kampo nga ablihan una ang maong dalan alang sa mga residente ug mga business stablishments nga maoy nahasol atol sa kagubot.  – BANAT NEWS