Resulta sa sea trial ipagawas karon

CEBU, Philippines - Karung adlawa gikatakdang ipagawas sa Maritime Industry Authority (Marina) ang resulta sa gihimong imbestigasyon sa kalit nga pagkapawong sa makina sa barkong MV Georich tunga-tunga sa kadagatan sa Negros niadtong milabay'ng adlaw'ng Sabado sa gabii nga miresulta sa pagkalangay sa 462 ka pasahero.

Ang George and Peter Lines nga maoy nag-operate sa maong barko gimandoang isuspenso una ang biyahe niini sukad niadtong pagkahitabo samtang gipahigayon ang imbestigasyon ug pagsusi sa kundisyon sa makina niini sa mga sakop sa imbestigador sa Marina-7. Ang Marina-7 mipahigayon og duha ka adlaw'ng sea trials sa maong barko aron pagsuta kun makasugakod pa ba ang makina niini sa pagbiyahe, kahinumduman nga mipalyar ang makina niini ug naaberya (wala masangad) duha ka oras human mobiya sa Dapitan City padulong unta sa Dumaguete ug giguroy nalang sa nahiaging barko sa Cokaliong Shipping.

Ang mga pasahero sa Cebu ang destinasyon gipasakay nalang og bus sa George and Peter Lines nga libre ug giulian usab sa ilang mga pleti.

Sa pakighinabi sa Banat News ni Inspector Mardon Martin sa Marina-7   nagkanayon nga karung adlawa masayran ang resulta sa ilang gipahigayong sea trial kung angayan pa bang pabalikon og biyahe ang MV Georich.

Sa pakighinabi usab sa Banat News ni Port Captain Gerry Enjambre malaumon silang positibo ang resulta sa maong sea trials sanglit ordinaryong problema lang sa makina ang nahitabo niadtong Sabado. - BANAT NEWS