Rama di mo-resign sa Sinulog Foundation

CEBU, Philippines -  Walay plano si Cebu City Vice Mayor Michael Rama nga moluwat sa katungdanan isip chairman sa Sinulog Foundation human mogawas ang taho nga mo-resign na siya kun ibasura sa Commission on Audit (COA) ang gipangayo sa siyudad nga exemption. Ang kagamhanan sa dakbayan nangayo og exemption sa COA Circular 2007-001 nga nagdili sa usa ka lokal nga kagamhanan paghatag og financial assistance ngadto sa mga non-governmental organization, foundation ug ubang people’s organization kung ang opisyal sa usa ka lokalidad dunay relasyon sa nagdumala sa organisasyon.

Si Rama isip chairman sa Sinulog, mao usab ang presiding officer sa konseho sa dakbayan nga maoy mohatag og pagtugot sa paghatag og hinabang pinansyal sa foundation.

Ang dakbayan maghatagan og minilyon ka pesos ngadto sa Sinulog Foundation aron maoy ihatag nga premyo sa mga mananaug sa festival.

Apan gitataw ni Rama nga ang iyang pagluwat sa katungdanan dili makapawagtang ug labaw nang dili maoy bugtong solusyon sa problema tungod kay ang amahan ni Konsehal Richard Osmeña nga si kanhi bise mayor Renato Osmeña, mao na ang kasamtangang presidente sa Sinulog Foundation.

“My resignation if ever, will not solve the problem unless Renato Osmeña will also resign because Renato Osmeña is the father Richie,” sumala ni Rama.

Sa kasamtangan miingon si Rama nga wala pa sa iyang huna-huna ang pagluwat isip chairman sa Sinulog samtang sila nagpaabot sa desisyon sa COA.

Nasayran hinuon nga ang COA magtigom ugmang adlawa aron hukman ang gipadangat nga petisyon sa kagamhanan sa dakbayan. “They are still going to act on our position unya mo-resign ta? We have to make our position clear, if they’re not going to accept our presentation, then we will cross the bridge when we get there,” dugang pamahayag ni Rama.  - BANAT NEWS