CEBU, Philippines - Ang gobernadora sa lalawigan sa Sugbu mi-takeover na sa pagdumala sa nakontrobersyal nga water system sa Tapilon Rural Waterworks and Sanitation Inc. sa Tapilon, Daanbantayan.
Nahimo kining kontrobersiya tungod sa panagsungi sa mga opisyales sa naasoy'ng water system ug sa mayor sa lungsod sa Daanbantayan nga si Mayor Sun Shimura.
Ang pormal nga pag-take over ni Governor Gwendolyn Garcia sa management sa Tapilon Water system nahitabo dihang mipirma og “Partial Compromise Agreement” ang nagkasunging opisyales sa Tapilon Rural Waterworks and Sanitation pinaagi sa ilang manager nga si Joel Rosell ug Shimura. Nakasabutan nga samtang wala pa mahuman ang kaso sa korte kun si kinsa ang labing angayan nga magdumala sa maong water system, ang gobernadora una maoy modumala aron di maapektahan ang serbisyo sa publiko. - BANAT NEWS