Siyudad dismayado sa desisyon sa UP

CEBU, Philippines - Dismayado ang kagamhanan sa dakbayan sa Sugbu sa desisyon sa University of the Philippines-Visayas Cebu College (UPVCC) pagpapahawa sa mga biktima sa sunog diha sa barangay Lahug niadtong miaging tuig.

Ang nahisgutang unibersidad mibasura sa hangyo sa mga molupyo sa sitio San Jose nga mopabilin sa pagpuyo sa luna niini sulod sa 15 ngadto sa 30 ka tuig. Tungod sa maong kalamboan, gihatagan na lang og unom ka buwan sa UPVCC ang kapin sa 60 ka pamilyang mangita og kabalhinan.

Butang nga wala magustuhi ni City Administrator Francisco Fernandez nga maoy nangulo kaniadto sa silent protest batok sa UPVCC administration.

Matud pa ni Fernandez nga dili angayang daginuton sa maong tunghaan ang 800 metro kwadrado nga giukupahan sa mga fire victims tungod kay giingong dako pa ang bakanteng luna niini gawas pa sa gihatag sa dakbayan nga luna niini diha sa South Road Properties (SRP).

Ang kagamhanan sa dakbayan nihatag og lima ka ektaryang luna sa SRP ngadto sa UP aron katukuran niini og tunghaan sa maong lugar.

Wala makakita og balidong rason si Fernandez sa katuyoan sa nahisgutang tunghaan pagbawi niini sa luna nga giukupahan sa apektadong mga informal settlers.

“Ang moral ani nga issue nganong daginuton pa man nila nang 800 square meters nga ka dako pa sa bakante sa ilang yuta diha sa Lahug, unya gipun-an pa gyud sila sa SRP og five hectares, nganong kinahanglan pa gyud nila nang daginuton?” sumala ni Fernandez. Nasayran gikan kang Fernandez nga ang apektadong mga residente gitakdang makigtagbo kang Mayor Tomas Osmeña karong adlawa aron mapadangat ang ilang sentimento uban sa pagpangayo og tabang sa ila unyang dangatan.

Gitinguhang mabawi sa UP ang gipuy-an sa mga informal settlers diha sa sitio San Jose tungod kay kini gamiton na alang sa educational purposes.

Ang 800 ka metro kwadradong luna sa tunghaan diha sa maong lugar kabahin sa 13 ka ektarya nga gidonar sa kagamhanan sa lalawigan ngadto sa UPVCC niadtong 1925.  – BANAT NEWS