Naghikog naabtan nagkirigkirig

CEBU, Philippines - Nagkirig-kirig pang nakit-an sa usa ka lalaki ang 19-anyos niining maguwang lalaki nga nagbitay sa gihigot nga pisi sa liog diha sa kusina sa ilang pinuy-anan sa barangay Macaas lungsod sa Catmon niadtong Lunes sa alas 3:00 sa kaadlawon.

Ang nagpakamatay mao si Josefel Hortelano, 19, molupyo sa nahisgutang lugar.

Matud pa ni PO2 Ben Navales sa Catmon Police dihang nahinabi sa Banat News ang manghud niining si Garbel Hortelano maoy nakadiskubre sa namatay samtang kini nagkirig-kirig pa nga nagbitay dapit sa pultahan sa ilang kusina nga dunay higot nga pisi sa liog nga gigakod ang pikas tumoy sa kahoy sa ibabaw nga bahin. Daling nangayo og tabang ang manghod ug gidali dayun pagdala sa Juan Dosado Memorial Hospital sa lungsod sa Sogod ang biktima apan gideklarar kini sa mga doktor nga dead on arrival.

Subay sa imbestigasyon sa kapulisan gituohang gugma ang hinungdan sa pagpakamatay niini sanglit duna may daghang ‘love letters’ nga nakaplagan duol sa gihikugan niini nga gituuhang gikan sa iyang hinigugma nga gihinganlan lang og ‘Charlyn.’

Matud ni PO2 Navales duna pay laing duha ka suwat nga gibilin ang namatay alang sa iyang inahan ug ang laing suwat alang sa iyang hinigugma nga si Charlyn nga nangayo og pasaylo sa iyang gihimo nga pagpakamatay.

Gikonsiderar sa kapulisan nga gugma ang motibo sa gihimong pagpakamatay sa biktima pinaagi sa paghikog.  – BANAT NEWS