Patay'ng lawas nabulit sa samad

CEBU, Philippines -Naputos sa samad dinunggaban ang kalawasan sa usa ka patayng lawas sa lalaki nga nakit-ang nagbuy-od daplin sa karsada taliwala sa daghang balilihan sa barangay Calajoan lungsod sa Minglanilla niadtong Domingo sa alas 3:00 sa kaadlawon.

Ang biktima mao si Florante Sanchez Racho, 27, molupyo sa Marian Village sakop sa nahisgutang lugar.

Matud ni PO1 Sean Delos Reyes sa Minglanilla Police dihang nahinabi sa Banat News usa ka nagpailang concerned citizen ang mitawag ug mipahibawo sa ilang buhatan kabahin sa patay'ng lawas nga nakaplagan sa maong lugar.

Atol sa gihimong pakisusi sa kapulisan nagbuy-od daplin sa karsada taliwala sa kasagbutan ang biktima nga naputos og dili mominos lima ka samad dinunggaban sa lain-laing bahin sa lawas ug maoy gituohang hinungdan sa kamatayon sa biktima. Gisuwayan pa unta og dala sa kapulisan ang biktima sa Minglanilla District Hospital apan gideklarar nga dead on arrival.

Subay sa imbestigasyon, ang biktima nakit-an pang mitambong og disco sayo nianang gabhiuna nunot sa kapistahan sa maong lugar ug dunay usa ka saksi nga gihinganlan og Arnulfo Avior, ang mitug-an nga duna siya'y nakit-an sa crime scene nga usa ka lalaking nagmaskara nianang maong kaadlawon ug maoy gituohang responsable sa krimen.   (BANATNEWS)