Love triangle' gyud - LCPO

CEBU, Philippines - Bisan paman sa pagdudang politically motivated ang pagbanhig patay sa lider sa mga supporters sa oposisyon sa Lapulapu pabiling “love triangle” ang anggulong gitutukan sa kapolisan gumikan sa mga ebidensya ug impormasyong ilang natigom.

Kini ang giluwatang pamahayag ni Lapulapu City Police Office director, Sr. Supt. Mariano Natu-el Jr. atol sa pakighinabi sa Banat News kabahin sa pagduda sa oposisyon sa motibo sa kamatayon ni Allan Berame ug pagkaangol ni Marites Amit nga gibanhigan niadtong Disyembre 31.

Matud pang Natu-el base sa natigom nga ebidensya ug impormasyon sa mga imbestigador pinanguluhan ni SPO2 Rolito Jumao-as, mas lig-on ug bug-at ang anggulong kasuko gumikan sa pangabubho ang motibo sa pagbanhig.

Sumala pang Natu-el may laing ka-relasyon si Berame ug maoy ilang gisusi karon. Gikatahong grabe ang kasuko sa mamumuno ni Berame gumikan sa pamaagi sa pagpatay, base sa imbestigasyon gihurot sa gunman ang tanang bala sa armas niini nga gigamit ngadto sa biktima.

Sa pagsubay sa mga imbestigador, nasutang pulos suod nga higala ni Berame ang higpit karong managkaribal sa politika sa Lapulapu nga sila si incumbent Lapulapu City Mayor Arturo Radaza ug mayoralty candidate ug incumbent councilor Junard “Ahong” Chan. (Bong Soriano) (BANATNEWS)