Pasahero sa nasangad nga barko nangabot na

CEBU, Philippines - Nangabot na kagahapon ang gatusan ka pasahero sa naaberyang barkong MV Georich sa kadagatan sa Negros human sa taas nga oras nga pagkadelatar sa ilang mga biyahe gikan sa Dapitan padulong sa Dumaguete ug dinhi sa Cebu.

Apan ang mga pasahero nasagmuyo sa tagdumala sa maong barko nga mao ang George and Peter Lines gumikan sa nahitabong pagka-delatar ug nanawagan sa mga awtoridad nga dili na kini tugutang makalawig og balik hangtud nga di masigurong seaworthy kini.

Ang MV Georich nga gipanag-iya sa George and Peter Lines nga magbiyahean og Dapitan-Dumaguete-Cebu gikatahong naaberya human maguba ang main engine niini duha ka oras human makabiya sa Dapitan alas-4 sa hapon niadtong Enero 2.

Sumala pa sa kumander sa District Eastern Visayas Philippine Coast Guard Anelito Gabisan dunay sakay nga 462 ka pasahero ang maong barko, 35 niini mga bata. Ang mga pasahero human sa pipila ka oras nga pag-utaw-utaw sa kadagatan duha ka milya gikan sa Apo Island giguroy sa nahiaging MV Filipina Ilo-ilo sa Cokaliong Shipping Lines nga padulong sa Dumaguete ug naabot sa Dumaguete pasado alas-12 na sa kaadlawon kagahapon.

Ang mga pasahero gikatahong gipakaon og biskwit sa mga crew samtang nagpaabot nga makaabot sa Dumaguete, samtang kadtong mga pasaherong molahos sa Sugbu gihatagan usab og pamahaw ug giulian sa ilang mga plete.

Apan usa ka Neil Antiquina, pasahero sa maong barko ang milusad og signature campaign sa mga kaubanang pasahero ug nanawagan sa mga hingtungdang ahensya nga pahunongon na paglawig ang maong barko hangtud nga masigurong seaworthy na kini.

“This is worst. This is not the first time this happened on the same vessel on the same route. At least in 2009, it happened twice, the most recent being the Oct. 31-Nov. 2009 incident,” sumala pa sa suwat ni Antiquina nga gipirmahan usab sa ubang mga pasahero.

Matud pa niini sa suwat nga 45 minutos pa ang milabay una pa sila pahibaw-a sa tinuoray nga sitwasyon sa barko.

Mibahad si Antiquina nga iyang ihatud ang petisyon batok sa nahisgutang barko ngadto sa Maritime Industry Authority karong adlawa.

Si Gerry Enjambre, port captain sa George and Peter Lines nga nakahinabi sa Banat News nagkanayon nga ang awtoridad na maoy modesider sa petisyon sa maong pasahero.

Apan iyang giklaro nga wala dugaya ang pagpahibalo sa mga pasahero sa sitwasyon tungod kay wala dayon masayri kung unsay problema sa makina.

“Syempre ang makina nagdagan inig kahunong ana init na siya, so, dili gyud ta makasusi dayun kung unsa ang problema,” pasabot pa ni Enjambre.

Samtang alang usab sa kaayuhan sa ilang mga pasahero wala sila magduha-duha og pangayo og tabang sa nahiaging barko sa Cokaliong Lines aron lang maabot sa Dumaguete ang mga pasahero ug gipangitaan og pamaaging makaabot gyud sa Cebu ang pasaherong misakay alang sa maong destinasyon.

Dunay gibana-banang 200 ka pasaherong ang destinasyon padulong sa Cebu nga human moabot sa Dumaguete gipasakay og Ceres Bus padulong sa Cebu ug ang pletihan giabaga sa maong kompanya ug naabot kagahapon sa alas-12 sa udto. – BANAT NEWS