CEBU, Philippines - Dead-on-arrival sa tambalan ang usa ka habal-habal driver human malukotlukot ang iyang gimanehong motorsiklo dihang nasaghid sa usa ka mini-dump truck niadtong Sabado sa gabii sa National Highway sa barangay Pasol lungsod sa Alcoy.
Ang namatay giila sa kapulisan nga si Bonifacio Mejares, 21, taga sitio Abaca, sa barangay Nug-as sa nahisgutang lungsod kinsa nakaangkon og grabing kadaot sa kalawasan ingon man sa iyang ulo.
Si SPO3 Eduardo Santander, desk officer sa Alcoy police station nga gikahinabi nagkanayon nga ang biktimang si Mejares paingon ngadto sa lungsod sa Dalaguete aron mopatubil og gasolina sa iyang motorsiklo.
Apan samtang nagdagan sa dulhogong dapit nga ‘zigzag’ ang agianan kalit kining mi-overtake sa gisundang motorsiklo.
Sa iyang pag-overtake gikasugat niini ang mini-dump truck nga may plakang YBU-976 nga gipanag-iya sa konsehal sa lungsod nga si Roel Antonio Sestoso ug gimaneho ni Allan Nievevez, 27, taga barangay Daanglunsud.
Gikatahong wala na makontrolar sa biktima ang manobela ug nasaghid kini sa walang ligid sa luyong bahin sa mini-dump truck hinungdan nga nabalintong kini makadaghang higayon. Gidali unta sa pagdala sa tambalanan sa Dalaguete ang biktima apan gumikan sa ka-grabe sa iyang mga bun-og sa lawas ug ulo gideklarar kining dead on arrival. Ang driver kasamtangan karong gitanggong sa Alcoy police Station samtang gihikay pa ang tukmang kaso nga ipasaka batok kaniya karong adlawa. – BANAT NEWS