Walay makalusot double registrants

CEBU, Philippines - Gipasalig sa Commission on Elections (Comelec) nga walay makalusot nga double registrants ingon man flying voters atol sa pagpatuman sa labing una nga poll automation sa eleksyon karung bulan sa Mayo sunod tuig.

Gibutyag ni Comelec Provincial Supervisor Atty. Lionel Marco Castillano atol sa interview sa DyDD nga sukwahi kaniadto pagkakaron duna silay national list of registered voters nga naka-encode sa computer.

Matud ni Castillano nga mao kini ang ilang basehan pagsuta niadtong nagparehistro kon wala ba gyud kini marehistro sa laing lugar una mibalhin og parehistro sa usa ka dapit.

Lakip sa una nilang pangayuon sa mga karaang botante ang valid Identification Card (I.D.) ug kadtong Comelec IDs sanglit masubay nila dayon kun nakarehistro ba kini sa ubang lugar.

Kadtong nagparehistro nga ilang masakpan nga aktibo pa ang registration sa laing lugar awhagon kini sa Comelec pagpirma og laing porma aron hingpit nga ma-transfer ang registration niini. Gihulagway hinuon ni Castillano nga malinawon ug hapsay ang dagan sa pagtapos sa gilugwayan nga registration sa mga bag-ong botante dinhi sa Sugbo kagahapong adlawa.

Matud ni Castillano bugtong ang siyudad sa Lapulapu lang ug Cebu City ang nakarehistro og 400 ka bag-ong botante matag adlaw samtang kadtong mga dagkong lungsod sa probinsya moabot lang og 40 ngadto sa 50 ang magparehistro matag adlaw samtang tag napulo lang matag adlaw kadtong mga gagmay’ng lungsod.

Human sa extended continuing registration, sugdan na usab ang pagpangandam alang sa piniliay sama sa printing sa mga balota karong bulan sa Enero. - Darrel Carumba (BANAT NEWS)