Pagpusil patay sa hostage taker lehitimo

CEBU, Philippines - Andam mohatag og legal assistance ang kadagkuan sa kapulisan sa lalawigan sa Sugbu ngadto sa ilang mga sakop sa San Remegio Police Station kini kun dunay mopasaka’g kaso human ilang napatay ang usa ka ex-convict nga si Egie Gallarde, 27. Kahinumduman nga niadtong Martes sa buntag patay si Gallarde human gipusil patay ni Insp. Rully Lauron, hepe sa San Remegio dihang iyang gi-hostage ang iyang igsuon ingon man pag-umangkon nga 5-anyos ug anak nga usa pa ka tuig sa ilang panimalay sa barangay Kayam.Si Sr. Supt. Jesus Gaquing Jr. director sa kapulisan sa lalawigan sa Sugbu nagkanayon nga legitimate ang maong operasyon ug wala siya’y nakitang kalapasan niini dihang ilang gipusil si Gallarde nga wala mopatuo sa warning shot sa mga police.

Hinuon giklaro niining nadawat na sa mga kabanay ug mipadayag nga dili mokiha sa kapolisan sa gidangatan sa suspek.

Hinuon si Insp. Lauron nagkanayon nga kun wala pa niya pusila si Gallarde hayan mapatay niini ang iyang gipaangkang igsuon nga usa ka minor de edad sanglit nakuptan na niya kini dihang midagan ug gihanaan na sa pagdunggab sa kutsilyo. - Guam Logroño (BANAT NEWS)