Duha nakuhaag armas sa Talisay checkpoint

CEBU, Philippines -  Duha ka lalaki ang gidakop sa kapolisan sa Talisay gumikan sa paghupot og armas ug kutsilyo diha sa sitio Mananga barangay Tabunok dakbayan sa Talisay alas 10:45 sa milabay’ng Martes sa gabii sulod sa usa ka pasaheroan.

Ang nadakpan mao sila si Ruel Orongan, 25, taga barangay Inayawan dakbayan sa Sugbo ug Randy Paredes, 32, nagpuyo sa sitio Cadicay, siyudad sa Talisay.

Ang duha nagsakay og pasaheroan paingon sa lungsod sa Minglanilla ug pag-abot sa may taytayan sa Mananga dunay checkpoint sa mga polis pinanguluhan ni Insp. Isagani Abalo ug nasakpan ang duha nga nagluklok sa maong mga hinagiban.

Nakuha gikan kang Orongan ang usa ka .38 kalibreng rebolber nga may tulo ka buhing bala ug kutsilyo usab kang Paredes.

Ang checkpoint gilusad kontra krimen gumikan sa mga nahitabong mga pagpanulis sa mga pasahero ning mga nangaging adlaw gumikan sa kapaskuhan. - Raymond Abarcas (BANAT NEWS)