Lahugay sa Comelec

CEBU, Philippines - Ipatuman na sa Commission on Elections karung bulan sa Enero sunod tuig ang lahugay sa tanang mga election officers sa kalungsoran ug dakbayan dinhi sa Sugbo.

Matud pa ni Comelec Provincial Supervisor Atty. Lionel Marco Castillano nga pagpangandam kini sa nagsingabot nga May 2010 election diin kadtong mga E.O. nga dunay mga paryenteng mokandidato sa lugar diin sila madestino mao ray apektado.

Apil sa maapektuhan sa lahugay kadtong mga election officer sa kalungsoran ug dakbayan nga gi-kontrahan og mga kandidatu aron paglikay nga dili ma-akusahan nga dunay gipaboran.

Gihulagway hinuon ni Castillano nga hapsay ug malinawon ang pagtapos sa gilugwayang registration sa mga bag-ong botante niadtong miaging adlaw.

Matud pa ni Castillano nga tutukan nila niining buwana ang paghashas sa mga bag-ong nagparehistro ingon man ang gikatakdang pagsugod sa printing sa mga balota karung petsa 9.

Nunot niini, gikatakda pang makigtagbo ang Comelec ngadto sa Philippine National Police (PNP) aron pagtumbok sa mga lugar nga angay ipaubos sa Comelec control karung umaabot piniliay sa Mayo. - Darrel Carumba (BANAT NEWS)