Dalaga Giluba sa tulisan

CEBU, Philippines - Samdan ang usa ka babaye human kini dunggaba sa usa sa duha ka lalaking tulisan nga nagsakay og motor pasado alas singko sa buntag niadtong milabay’ng adlaw diha sa dalan Escario barangay Kamputhaw.

Ang nasamdan giilang si Jacelyn Degnito Deloso, molupyo sa Escario Extension sa nahisgutang lugar samtang ang tulisan gihulagway nga itumon ug taason nga lalaki.

Sa pakighinabi sa Banat News sa biktima kini mibutyag padulong na siya nga mouli sa ilang panimalay ug iyang nabantayan nga adunay motor nga naghunong sa unahan apan wala lang niya kini panumbalinga.

Dihang nakaduol na siya kalit lang gilabni sa lalaki ang iyang bag, apan dihang iyang gipugngan kalit siyang gidunggab niini sa iyang dughan ug bukton. Ang mga tulisan daling miikyas samtang ang biktima nagpatabang sa mga tanod sa barangay Kamputhaw ug gidala sa tambalanan

Nakuha sa tulisan mao ang brown nga bag sa biktima nga adunay sulod nga cellphone, cash ug uban pang gamit pangbabaye. - Lesley Caminade (BANAT NEWS)