Tomas gibasol ni Alvin

CEBU, Philippines - Gibasol ni kanhi Cebu City Mayor Alvin Garcia si Mayor Tomas Osmeña tungod sa giingong pagsabwag og sayop nga impormasyon ngadto sa publiko.

Partikular na niini ang taho nga nataktak na sa listahan sa Comelec ang partidong Kugi Uswag Sugbu (Kusug) nga gipanguluhan ni Garcia.

Alang sa kanhi mayor, panglawgaw lang ang gihimo ni Osmeña tungod kay kini giingong walay lehitimong issue nga ilabay batok kanila.

“Kanang iya pagnukos-nukos ba, paglubog, under handed tactics ba, dili sila makaatubang namo sa issue, mao nga mukuha na sila ug non-issue,” sumala pa ni Garcia.

Gipadayag hinuon ni Osmeña, nga siya igo lang usab nga nakadungog sa maong report, labot sa pag-delist sa Comelec sa Kusug party.

Kini tungod sa kapakyas sa partido kaniadto pagduso ug letter of authority sa nominating official niini, ingon man sa signature specimen.

Gikataho hinuong ang Comelec-Manila giingong mipabilin sa Kusug sa ilang listahan human usab makaduso sa gikinahanglang rekisitos.

Apan giklaro ni Osmeña nga kung magpabilin sa listahan ang Kusug party ug ang mga kandidato niini, duna gihapoy dakong pangutana ang mayor.

“I don’t care kung makadagan sila o dili, ang pangutana kung makadaug ba sila o dili, tan-awa ra ang ilang grupo Kusug kuno morag insulto gyud na sa kultura sa mga Sugbuanon, ilang gigamit ang Kusug pero hinay gyud,” matud ni Osmeña.

Una nang giangkon ni Garcia nga wala pa makahuygo ang ilang partido pagpaila-ila sa mga kandidato niini ngadto sa mga molupyo sa dakbayan.

Samtang ang Bando Osmeña Pundok Kauswagan (BOPK) ni Osmeña, giingong taud-taud nang nipahigayon og mga pulong-pulong sa kabarangayan.

Gipadayag hinuon ni Garcia nga sugod sunod semana, mobuwelo na ang ilang grupo sa pagpahibawo sa mga Sugbuanon sa ilang tinguha sa umaabot nga eleksyon. – BANAT NEWS