Polis mihubog sa mga bata nahanaw

CEBU, Philippines - Police nga mipa-inom ug ilimong makahubog sa unom ka minor de edad nga nalandig sa tambalanan nagtago-tago na karong mga higayona ug wala na mopatim-aw sa ilang panimalay sa Unit 1 Opra Barangay Kalunasan ning dakbayan sa Sugbu.                 

Si PO3 Noel Monares sakop sa Regional Intelligence Office (RIO) wala na igkita sukad niadtong Martes sa hapon human mireklamo ang mga ginikanan sa mga bata diha sa Guadalupe Police Station nga iyang gipainom og sikat karong gin atol sa birthday party sa anak niining babaye.

Gikatahong nagpa-parlor games si Monares sa mga bata pinaagi sa pagpainom sa maong gin bugti sa premyong P20, apan human mangahubog ang mga bata nangawad-an sila og panimuot maong gidala sa tambalanan ug gi-dextrose.

Ang maong mga bata nangahubog ug nangalandig sa Cebu City Medical Center.

Si Sr. Insp. Mario Monilar ang hepe sa Guadalupe Police Station nga gikahinabi sa mga tigbalita nagkanayon nga moduso sila’g “special report” sa maong insidente ngadto sa buhatan ni Sr. Supt. Patrocinio Comendador ang director sa kapulisan sa dakbayan sa Sugbu.

Kini aron si Comendador maoy moawhag sa pangulo sa RIO nga si Supt. Glenn Maya aron mandoan si PO3 Monares nga mopatim-aw sa Guadalupe police station ug atubangon ang mga reklamo batok niini.     

Sumala pa ni Monilar nga kasong child abuse ang ilang ipasaka ngadto kang PO3 Monares ubos sa RA.7610 sanglit ang usa sa mga ginikanan sa minor de edad ang desididong moduso’g reklamo.              Gibutyag niini ang inahan sa usa sa mga bata secretary sa asawa sa usa ka kapitan sa habagatang barangay sa dakbayan sa Sugbu nga usa usab ka doktor ug maoy gikatahong nagrabihan maong gidala kini sa usa ka pribadong tambalanan ning dakbayan.                                   Samtang si Sr. Supt. Louie Oppus ang hepe sa Operations and Plans Division sa PRO-7 mibutyag nga mahimong morekomendar si PRO-7 Chief Supt. Lani-O Nerez sa pagpa-imbestigar niini ngadto na sa RIAS. (Guam Logroño)

26-anyos nasubo sa uyab, naghikog

Ni Brenda D. Batuto uban ni Raymond D. Abarcas, UV Journalism Intern

Patay ang usa ka 26-anyos nga lalaki human kini maghikog gamit ang wire nga gihikot sa iyang liog niadtong Martes sa gabii sulod sa iyang kwarto sa barangay Lagtang, dakbayan sa Talisay.

Ang namatay giila sa mga polis nga si Raul Cabo, ulitawo apan dunay kanhi kapuyo ug residente sa nahisgutang lugar.

Si Cabo napalgan sa iyang mga pag-umangkon nga nagbitay na diha sulod sa iyang kwarto nga wala na maglihok.

Ang igsuon ni Cabo uban kang Ruel Rabadon daling mitangtang sa wire niini diha sa liog ug gidala dayon ngadto sa Talisay City District Hospital apan wala na kaabot nga buhi sa maong tambalanan.

Sila si PO2 Narciso Alforque ug PO1 Jundave David daling miresponde sa maong hitabo human makadawat og tawag sa telepono.

Base sa imbestigasyon sa maong mga polis nga sa wala pa mahitabo ang insidente, nianang buntag sa nahisgutang adlaw si Cabo nag-inom tungod sa matud pa kaguol nga gibati niini.

Si David nga nahinabi sa Banat News mibutyag nga si Cabo dunay kapuyo ug nakabaton sila og duha ka anak.

Giingong si Cabo wala ma-uyoni sa paryente sa iyang kapuyo ug gibuwag silang duha ug wala na usab ipakita ang iyang duha ka anak ngadto kaniya nga maoy hinungdan sa iyang kahiubos ug gituohan sa iyang paghikog. (Brenda D. Batuto uban ni Raymond D. Abarcas, UV Journalism Intern) (BANATNEWS)