Vintage bomb napalgan

CEBU, Philippines - Naukay sa miaging buntag ang sitio Rattan, barangay Tanke, dakbayan sa Talisay human mapalgi sa usa sa mga molupyo ang usa ka vintage bomb sa ilang palibot.

Si PO3 Edwin Alvarado, duty desk officer sa Talisay Police Station mibutyag sa Banat News nga mitawag dayon sila og mga bomb expert sa ilang provincial headquarter human nila madawat ang taho kalabot sa vintage bomb nga napalgan sa taga sitio Rattan.

Ang maong bombang karaan didto hipalgi sa nahawan nga lugar gumikan sa pagkaugdaw sa 13 ka balay atol sa sunog nga nahitabo niadtong Biyernes sa gabii.

Maayo nalang kay wala makabuto ang maong bomba atol sa sunog nga nahitabo sa maong dapit. Gibasol sa ubang mga biktima ang kabomberohan sa maong dakbayan gumikan kuno sa kadugay miabot niini sa maong lugar nga nasunogan nga maoy hinungdan sa pagka-abo sa 13 ka panimalay.

Gibanabana sa kabomberohan nga mokabat sa P400,000 ang kantidad sa mga naugdaw nga mga kabtangan. (Raymond D. Abarcas UV Journalism Intern) (BANAT NEWS)