Mga bus nga pasaheroan sa Cebu South Bus Terminal padayon sa pagbiyahe sulod sa 24-oras bisan pa sa tungang gabii sa pagsugat sa Bag-ong Tuig.
Kini maoy gipasalig ni Eva Encavo nga maoy supervisor sa nahisgutang terminal nga nahinabi sa Banat News kagahapon samtang nagpunsisok na karon ang mga pasahero sa ilang terminal nga mamauli sa kalungsoran.
Matud pa niini nga walay hunong ang pagbiyahe paingon sa habagatang kalungsoran sa lalawigan.
Giklaro usab niyang gitugotan nila ang mga mini bus nga pasaheroan nga mosulod sa terminal pagpasakay og pasahero basta mobayad lamang usab sa balayranan.
Si Encavo miingon nga adunay lagda nga gipatuman ang tagdumala sa terminal ug kon ang mga drayber nga hingtungdan motuman lamang niini dili gayod kini hikawan sa pagsulod sa terminal.
Dugang pa ni Encavo nga hingpit na nilang nahapsay ang pagpadagan sa terminal alang sa pagpasulod sa mga sakyanan ug pagpasakay sa mga pasahero nga naglakip usab sa seguridad.
Kini ang hinungdan nga niadtong miaging pagsaulog sa Pasko bisan sa kadaghan sa mga pasahero wala masinati ang suliran. (Romeo Limpangog) (BANAT NEWS)