Nanunggab gibadlong pagpabuto

CEBU, Philippines - Usa ka minor de edad nga gibadlong tungod kay nagpabuto og rebentador midunggab sa usa ka batan-on diha sa Purok Thunder Brgy. Babag dakbayan sa Lapulapu sa milabay’ng gabii.

Ang biktima mao si Daniel Cahayagan, 19, samtang ang midunggab kaniya mao ang usa ka 14-anyos nga lalaki ug mga residente usab sa maong dapit.

Ang suspek gikatahong nagpabuto og rebentador nga piccolo diha sa maong dapit ug natunong usab nga maoy pag-agi sa biktima napunta diha kaniya ang maong pabuto.

Tungod sa kakugang sa pagbuto giduol sa biktima ang suspek ug gikatahong gisagpa ang naulahi.

Apan sa dayong pagtalikod sa biktima wala kini makabantay nga dunay gisuksok nga kutsilyo ang suspek ug dayong dunggab sa likod ni Cahayagan.

Si Cahayagan daling gidala sa Lapulapu District Hospital ug kasamtangang giobserbahan sa mga mananambal.

Samtang ang 14 anyos nasikop usab kini ug gidala sa Lapulapu police headquarters. (Bong Soriano) (BANATNEWS)