Death toll sa Ferry nga nalunod mosobra 50

CEBU, Philippines - Gikabalak-an sa mga sakop sa Philippine Coast Guard (PCG) nga molapas pa sa 50 ka mga tawo ang nakalas sa aksidente sa duha ka ferry boats nga nangalunod sa milabay'ng semana sa Luzon.

Ang PCG ug mga barko sa Philippine Navy padayon pang nagsuhid sa kadagatan diha sa Batangas ug Manila Bay sa habig sa Cavite pagpangita sa mga survivors sa MV Baleno 9 nga nalunod niadtong Sabado sa gabii sa Batangas ug mga pasahero sa Catalyn B niadtong bisperas sa Pasko sa kadagatan sa Manila Bay.

Sa trahedya sa MV Baleno-9, duna pay 23 ka tawo ang missing samtang 11 pa usab ang gipangita sa nalunod nga Catalyn B, ang mga divers mibutyag nga nakit-an na nila ang Catalyn B ug may 12 ka mga patay'ng lawas diha sa sulod niini gawas sa upat ka nahauna nang napalgang patay apan duna pay 11 ka missing.

Duna nay 27 ka kumpirmadong patay sa Catalyn B nga ginama sa kahoy nga nalunod human magkabangga sa usa ka fishing boat nga ginama sad sa puthaw.

“The survivors said the ship went down in seconds and other people did not get out, so the missing bodies may still be inside,” matud pa ni Maritime Industry Authority chief Maria Elena Bautista.

Sa MV Baleno-9 unom ang kumpirmadong patay, 60 sa mga pasahero niini ang naluwas, sumala pa sa report sa ABS-CBN.

Kahinumduman nga ang Pilipinas maoy nakatala og labing grabeng trahedya sa kadagatan nga dili atol sa gubat, niadtong Disyembre 1987 gibana-banang 4,000 ka mga tawo ang namatay human magbangga ang MV Doña Marilyn ug usa ka oil tanker diha sa Manila Bay.

Nasundan pa kini uban pang mga trahedya sa kadagatan nga miresulta sa sunod-sunod nga pagpatuman og mga bag-ong patakaran sa kaluwasan sa mga pasahero sa kadagatan. BANATNEWS)