CEBU, Philippines - Naglisod sa pagpasaka og kaso ang kabomberohan sa dakbayan sa Mandaue sa nahitabong pag-ulbo sa mga tindahan og paboto sa firecracker zone area sanglit naglisod man usab sila sa pag-ila sa tawong maoy responsable sa pagkasunog.
Tulo ka tawo, usa ka babaye ug duha ka bata ang nakalas sa maong hitabo samtang pito usab ang naangol dihang kalit nga miulbo ang gibaligyang pabuto sa 57 ka stalls.
Si FO3 Cifriano Codilla, ang imbestigador sa Bureau of Fire Protection (BFP) sa pakighinabi sa Banat News kagahapon mitug-an nga naglisod sila pagtumbok kun si kinsay miitsa og baga diha sa stall number 27 nga miresulta sa pag-ulbo.
Usa ka drayber sa traysikad nga natigayong nahiagi sa lugar igo rang nakakita nga may nagsiga nga butang nga nalagpot diha sa lamesa sa stall 27 nga may mga baligyang pabuto apan wala siya makakita sa dagway sa tawong miitsa niini.
Bisan ang mga biktima ug survivors nga iyang gikahinabi miangkong nakakita gyud sa pagtugpa sa kalayo apan wala kini makakita kon diin kini maggikan.
Gidili sa firecracker zone area ang pagpanigarilyo gani gibutangan kini og dako kaayong karatulang may nakasuwat nga “no smoking area.”
Si FO3 Codilla miingon nga kumpleto sa rekisitos ang mga vendors nga makabaligya og pabuto sa maong dapit.
Si Mayor Jonas Cortes mi-ban na sa tanang matang sa pabuto sa iyang dakbayan ug mimando kang Sr. Supt. Orlando Ualat sa pagsakmit sa mga pabotong ibaligya sa dakbayan sa Mandaue.
Si Ualat nga nahinabi sa Banat News nagkanayon nga hasta ang tinago-tago nga pagpamaligya og paboto ilaha usab pangitaon ug sakmiton bisan paman duna nay nahatag kanila sa sayo nga mayor’s permit, business permit ug uban pa tungod sa kamandoan sa labaw'ng opisyal sa dakbayan.
Ang BFP sa Mandaue misuporta usab niini ug usa sa mga mopatuman sa maong kamandoan. BANATNEWS)