CEBU, Philippines - Mga namaligya’g pabuto dinhi sa dakbayan sa Sugbu ug Lapulapu subling gi-inspection sa pangulo sa Police Regional Office (PRO-7) Chief Supt. Lani-O Nerez kagahapong adlawa.
Ang pag-inspection ni Nerez sa mga namaligyag pabuto gitumong kini aron dili na masubli ang nahitabo sa dakbayan sa Mandaue nga tulo ang nakalas dihang miulbo ang mga stalls sa pabuto atol sa pagsugat sa Pasko.
Unang gi-inspection niini mao ang mga stall sa pabuto diha sa South Road Property (SRP) ug gipakurihian ang gilay-on sa mga stalls nga sikit ra kaayo.
Gimandoan sila ni Nerez nga magdistansyahay og 25 ka tiil matag stalls sa pabuto, gipabutangan og firetrucks sa Cebu City Fire Department, ingon man pagpalayo sa mga sakyanan sa mga mamalit og pabuto.
Gipasabot niining delikado kun ang mga sakyanan nga i-parking diha duol sa mga stalls gumikan kay peligro kun inig paandar niini mokilab og kalayo.
Human sa iyang pag-inspection sa SRP gisunod niini ang pag-inspection sa mga stalls sa pabuto sa barangay Babag ll dakbayan sa Lapulapu.
Hinuon nakita niining misunod sa gipatumang lagda ang mga namaligya didto pinaagi sa pagbutang og mga tubig duol sa ilang mga tinda ingon man dunay firetruck nga nagsuroy-suroy, gipakurihian hinuon niini ang pag-parking sa mga sakyanan.
Gimando usab ni Nerez sa tanan niyang mga sakop ang pagkumpiskar sa tanang mga baligyang pabuto nga wala sa firecracker zones ingon man ang mga lantaka.
Sa pikas nga bahin si Sr. Supt. Patrocinio Comendador, director sa kapulisan sa dakbayan sa Sugbu maoy nangulo kagahapong adlawa sa pagpasirit og tubig sa mokabat P10-15 mil nga kantidad sa nagkadaiyang pabuto nga ilang nasakmit nga gipamaligya gawas sa firecracker zone sa dakbayan. BANATNEWS)