6-anyos patay sa lantaka

CEBU, Philippines - Patay ang usa ka 6-anyos nga batang lalaki human kini mabuthi og unay sa iyang lantaka diha sa iyang nawong nga maoy nakapapuno og aso sa baga ug nakapaluto sa kasingkasing niini.

Nahitabo kini niadto pang Sabado sa hapon sa barangay Tanke, dakbayan sa Talisay apan ang maong insidente wala ma-report sa mga ginikanan ngadto sa kapolisan.

Ang bata nga si Yuri Minguito nakaangkon og grabeng kadaot sa iyang kasingkasing ug baga mugna sa kusog nga boto sa lantaka. Natangtang usab ang usa ka ngipon niini sa bag-ang tungod sa kakusog sa boto.

Ang inahan sa bata nga si Evangeline, 42, mibutyag sa Banat News kagahapon nga ang maguwang ni Yuri maoy tag-iya sa lantaka.

Mga alas 3 sa hapon, si Evangeline nanglaba samtang ang bata nakahigayon sa pagduwa sa lantaka tungod kay ang iyang maguwang nagduwa og basketball.

Si Yuri nagpabuto sa lantaka duol sa balay sa ilang silingan ug gibadlong pa kini.

Ang lantaka lapas pa sa gitas-on sa bata. Apan wala kini makapugong sa bata pagduwa niini pinaagi sa pagtukod sa lubot sa lantaka ngadto sa yuta ug mikinto kini aron tayhopon ang pangunahang lungag apan sa maong higayon mi-spark ang lighter sa lubot sa lantaka ug misiga hinungdan nga mibuto kini.

Si Evangeline nagkanayon nga nahibulong na siya sa dihang nagsiyagitay na ang iyang mga silingan human sa usa ka boto. Sa dihang iyang gisusi mao na lay iyang nakita ang iyang anak nga nasunog na ang baba ug liog ug milagom na.

Apan nakalakaw pa ang bata pauli sa ilang balay.

Daling gidala si Yuri sa Talisay City District Hospital apan sa dihang nagsakay pa sila og traysikol misuka kini og dugo.

Si Yuri gi-refer ngadto sa Vicente Sotto Memorial Medical Center, apan didto kini nakabsi sa kinabuhi.

Matud ni Evangeline nga base sa resulta sa X-ray, naluto ang kasingkasing sa bata ug ang baga niini napuno sa aso nga maoy gituohan sa kamatayon niini.

Si Kapitan Perla Cabanes human makahibalo sa hitabo nangayo og panabang sa kapolisan alang sa ilang operasyon pag-embargo sa mga lantaka aron malikayan ang laing disgrasya.

Sa laing taho, ang Banat News nakadawat og taho kabahin sa usa ka amahan nga namatay tungod kay giingong gidul-itan og lantaka ngadto sa iyang dunggan sa iyang anak.

Ang maong insidente giingong nahitabo diha sa usa ka barangay sa lungsod sa Minglanilla.

Base sa impormasyon nga tungod sa kakusog sa boto naukab ang bagolbagol sa amahan ug milugwa ang mata.

Apan walay report nga nadawat niini ang kapolisan sa lungsod lakip na ang mga opisyal sa maong barangay nga nahinabi sa Banat News kagahapon.

Si Insp. Leoncio Baliguat Jr. nga nahinabi sa Banat News kagahapon nagkanayon nga wala silay nadawat nga kamanduan sa pagsikop o pag-embargo sa mga lantaka apan niining ulahing hitabo nga adunay bata nga namatay hingusgan nila karon ang kampaniya batok sa lantaka aron malikayan ang laing disgrasya bisan og sa Minglanilla wala silay nadawat nga reklamo kabahin niini.   BANATNEWS)