One Cebu sa Barili mas nalig-on

CEBU, Philippines -  Nahimong mas lig-on karon ang One Cebu ticket ni Gobernador Gwen Garcia sa Barili human niya maumol ang formula nga ang One Cebu pangulohan sa incumbent mayor nga si Dr. Teresito Marinas, nga gibase sa prinsipyo sa equity of the incumbent.

Ang igsoon sa gobernador nga si Marlon Garcia kinsa, sa sayo pa gipaluyohan na sa mayoriya sa mga barangay kapitan, maoy mopares pagka -bise mayor ni Mayor Mariñas sa maong lungsod.

Sa gihimong panagtagbo sa mga miyembro sa Association of Barangay Captains (ABC) didto sa barangay Guibuangan, Barili sa miaging Decembre 23, nga gitambungan sa dul-an sa 40 ka mga kapitan, giingon sa gobernador nga mas mabulahan pa gayud ang mga barangay sa Barili karon nga solid ang One Cebu niya sa maong lungsod.

Gani, matud ni barangay captain Nestor Presbitero sa barangay Paril, dili lang ang ilang barangay maoy mabulahan, kun dili ang barangay Giloctog ug Cagay usab, kay mahilakip na karon sa asphalting project ang ilang dalan, nga dugay na nga wala matagad.

Ang maong proyekto sa pagpangaspalto sa mga karsada sa maong mga barangay gisuportahan sa pundo ni Kongresista Pablo John Garcia.

Ang One Cebu ticket sa gobernador karon sa Barili gipangulohan ni Mayor Mariñas ug ni Marlon Garcia.

Ang ilang mga kauban sa pagka -konsehal mao sila si kanhi bise mayor Loy Ponsica, mediaman Rene Alquizola, kanhi konsehal Hector Celis, barangay captain Ted Caumeran sa Poblacion ,ug mga incumbent nga sila si William Ouano, Fredo Pabroa ug Casildita Alquizola.

Walay ika- upat nga kandidato gikan sa orihinal nga grupo sa mayor, tungod kay wala magkasabot ang lima kung kinsa kanila ang malakip. (Wen Celen)   (BANATNEWS)