Nindot karong Paskoha - Tomas

CEBU, Philippines - Sa labing unang higayon gihulagway ni Cebu City Mayor Tomas Osmeña nga labing nindot ang iyang pagsaulog sa Pasko niining tuiga.

Pipila ka rason niini mao nga una, ang iyang pagkalingkawas sa iyang sakit human usab ma-diagnose sa hinapos nga bahin sa miaging tuig nga aduna siyay urinary bladder cancer.

Ikaduha, gikalipay usab ni Osmeña ang pag-graduwar sa iyang anak isip Summa Cum Laude sa kursong Bachelor of Arts major in Philosophy.

Ang bugtong anak sa mayor nga si Miguel, bag-o lang nakalampos sa iyang kurso sa University of California Los Angeles (UCLA) didto sa Estados Unidos.

Matud ni Osmeña nga wala na siya’y laing pangayuon pa sa kahitas-an tungod kay siya giingong nagmalipayon niining paskoha.

“This is the best Christmas that I ever had, kay nawa gyud ang akong kanser, what more do I want? unya ni-graduate akong anak Summa Cum Laude sa UCLA, what more do I want? happy kaayo ko,” sumala ni Osmeña.

Maglisod hinuon paghimo og projection ang mayor alang sa kaugmaon sa nasud sa umaabot nga tuig tungod kay adunay ipahigayong eleksyon.

Nanghinaut si Osmeña nga magiyahan ang katawhan sa piniliay ug mapili niini ang mga lider nga takus ug angayang mohupot sa renda sa kagamhanan.

Gitataw hinoon sa mayor nga ang dakbayan wala magsalig sa resulta sa eleksyon tungod kay ang siyudad giingong preparado na pagbarug sa kaugalingon.

Kini tungod kay ang dakbayan giingong nagsugod na pag-ani sa abot diha sa South Road Properties (SRP) gikan sa interesadong mga investor.

Matud ni Osmeña nga gawas sa investment nga misulod sa SRP, daghan pa ang mga magpapatigayon nga mobubo og puhonan diha sa maong lugar sa sunod tuig. (Elly Bolonos)    (BANATNEWS)