CEBU, Philippines - Patay nang midangat sa tambalanan ang mananggotay dihang kini natagak gikan sa punoan sa lubi diha sa barangay Poblacion, dakbayan sa Talisay kagahapon sa buntag.
Ang biktima mao si Jose “Joe” Paltingca, mananggiti ug nagpuyo sa barangay Poblacion sa nahisgutang dakbayan.
Si Lesley Duhaylungsod, 24, nga nahinabi sa Banat News mibutyag nga ang biktima misaka sa lubi kilid sa panimalay sa giilang si Nita Baguio nga walay nagsugo.
Dugang pa ni Duhaylungsod nga si Paltingca nabantayan niyang nakainom og ilimnong makahubog. Apan dihang gisanggot na niini ang ikaduhang bulig sa butong kalit nilang nadungog ang lagubo sa atop ug dihang ilang gisusi nagdungan diay og katagak ang butong ug si Paltingca. Matud pa sa mga nakasaksi, nabitik ang biktima sa pisi niining gigamit ug adto kini mitapsing sa atop nga sin maong natabas ang dunggan niini ug nag-una ang ulo nga naugbok sa ubos. Daling gidala ang biktima sa Talisay City District Hospital apan gideklarar sa nag-atimang doktor nga dead on arrival. – BANAT NEWS