Motor vs motor babaye patay, laing upat naangol

CEBU, Philippines - Usa ka babaye ang patay ug upat naangol sa panagbangga sa duha ka motorsiklo diha sa nagkurus nga dalan sa barangay Guinsay siyudad sa Danao niadtong Sabado sa alas 4:30 sa hapon.

Ang patay nang naabot sa tambalanan mao ang usa sa tulo ka pasaherong si Pasencia Terando, taga sitio Daghol barangay Guinsay, samtang nangaangol ang kauban niining pasahero nga sila si Angie Gian, 11, ug Lucena Tabilid, pulos mga molupyo sa nahisgutang lugar.

Samtang apil sa naangol mao ang drayber sa ilang gisakyan nga Honda TMX nga si Elnick Hermoso, molupyo sa dalan Colon, Danao.

Samtang ang gikabangga nilang motorsiklo mao ang Suzuki motorcycle nga gimaneho ni Ritchie Hermoso, ug molupyo sa Cambubho, Danao ug apil usab sa naangol.

Subay sa imbestigasyon sa hepe sa Traffic Group sa Danao nga si Insp. Aldrin Villacampa, ang Honda TMX nga gimaneho ni Hermoso gikan sa Cogon Road ug dihang nisulod kini sa highway ug paingon nang mo-left turn paingon sa amihanang bahin aksidente kining gidasmagan sa Suzuki motorcycle nga gimaneho ni Hermoso.

Tungod sa kakusog sa panagbangga ang duha ka drayber ingon man ang tulo ka pasahero pulos nalabay sa lain-laing direksyon ug mitugpa sa karsada hinungdan sa ilang pagkaangkon og grabeng kadaot sa ulo ug kalawasan.

Daling gidala ang tanang mga biktima sa Danao City District Hospital apan gideklarar nga dead on arrival si Terando tungod sa kadaot sa ulo. Nasuta nga ang tulo pulos wala magsul-ob og mga helmet.

Samtang ang ubang mga naangol gibalhin usab dayon sa tambalanan dinhi sa dakbayan sa Sugbo alang sa dugang medikasyon.

Ang traffic group sa Danao padayon pa sa ilang imbestigasyon pagtumbok kun si kinsa ang sad-an sa maong panagbangga. – BANAT NEWS