Espina nagplanong librehon mga kabus nga ma-hospital

CEBU, Philippines - Tungod sa mga problema ug kawalay kasigurohan sa publiko nga madala sa mga tambalanang pribado ilabi na niadtong emergency cases, usa ka kandidato sa pagka-kongresista sa ika-unom nga distrito nga kung palaron, nagplanong mohimo og balaudnong moatiman niini.

Si Rene 'r.e' Espina Jr.,  nga usa ka international economist, nagkanayon nga buot niyang himuon ang “Emergency Trauma Health Bill nga dako og ikatabang sa mga emergency cases sa mga tawong walay ikabayad sa mga tambalanan.

Partikular na niini ang mga tawong walay mga health insurances nga dako og papel sa pag-admit sa mga pasyente diha sa mga pribadong tambalanan, sanglit sa mga pampublikong tambalanan ‘unya-unyaon’ pa ang pasyente ug sa mga pribado usab nga tambalanan pangitaan og health insurances o ba kaha down payment aron lang ma-admit.

Kini partikular sa mga biktima sa pagpamusil, pagpanunggab ug trauma cases nga di dayon matabang sa mga pribadong tambalanan nga alang kang Espina di makatarunganon.

Matud pa ni Espina sa iyang umolong balaudnon isukip didto nga matag pribadong hospital hatagan og 20 porsiyentong tax exemption matag tuig apan ang diskwento igahin nila alang sa mga kabus nga madala sa ilang tambalanan.

Lakip usab ang mga doktor, ug mga nag-alagad sa pribadong tambalanan sama sa mga espesyalista lakip na ang health care workers hatagan og 20 porsiyentong exemption sa buhisan.

Samtang ang mga pribadong tambalanan hatagan og 100 porsiyentong tax incentives sa matag paliton nilang modernong ekipo sa tambalanan.

Dako ang pagtuo ni Espina nga daghan ang mopabor sa maong balaudnon sanglit daghan ang mabulahan niini ilabi na ang mga nagtrabaho sa pribadong tambalanan ug labaw sa tanan ang mga kabus.

Sa pagkakaron, bugtong tabang sa gobiyerno mao ra ang Philippine Health Insurance nga dawaton sa mga pribadong tambalanan apan sagad kuwangon gihaponn ug pangayoan gihapo og downpayment ang pasyente. (Rey Pasaporte)   (BANATNEWS)