SK Pageant sa Lapu' naputos og mga pagsaway

CEBU, Philippines - Naputos og mga pagsaway si Lapu-Lapu City Sangguniang Kabataan Federation (SKF) president Reymar Dico human wala mahatag ang cash prizes sa mga mananaog sa gipahigayon nga Miss SK Inter-barangay beauty pageant.

Ang Miss SK Inter-barangay beauty pageant gihimo niadtong Disyembre 23 didto sa Lapu-Lapu City Auditorium diin giapilan og 12 ka mga maanyag nga kandidata ang misalmot.

Si Basak SK chairperson Grace Jumao-as nga nahinabi sa Banat News mipadayag og kasagmuyo ngadto ni Dico tungod sa giingong walay klarong plano pagpahigayon sa maong Miss SK Inter-barangay.

Giingong kinalit-kalit lang nagpatawag og meeting si Dico ngadto sa mga SK heads kabahin sa maong kalihukan ug mitudlo dayon kang Jumao-as isip event organizer bisan og walay budget nga gitunol.

“Everyone was so disappointed including me. On the day of the pageant, wala gyud siya nagpahibalo nga wala diay prizes nga makuha ang makadaog ug ang mapilde,” sumala pang Jumao-as.

Ang beauty pageant gisugdan sa alas-11 sa gabii ug natapos sa alas 2:30 sa buntag sa Disyembre 24. Sa dihang na-proklamar na ang mananaog giingnan lang sila ni Dico nga ipakuha nalang sa iyang opisina sa ala 1:30 sa hapon sa Disyembre 24 ang premyo.

“Gipa-asa niya ang mga candidates for the prizes but then wala niya gihatag kay nahabilin daw. He tried to walk out in order to escape from the complaints but naa nama’y commotion with the artist and Reymar. Wala’y fund unya nagtuga-tuga og pa-show but no money diay,” dugang pa niini. Gikatahong P8,000 ang premyo alang sa first place, P5,000 sa second place ug P3,000 para sa third place. Samtang P500 ang consolation prize ug P300 sa minor awards.

Si Dico dihang gihinabi sa Banat News miangkong wala gyud mahatag ang premyo kay nahabilin ngadto sa ilang buhatan.

“I told the winners to get their prizes on December 24 at 1:30 in the afternoon and I forced my SK staff to be there at the office para makuha ang prizes pero unsa ma’y nahitabo? Ang uban wala miadto sa opisina,” matud pa ni Dico.

Giakusahan hinuon ni Dico si Jumao-as nga maoy nanibya og mga bakak ngadto sa mga talents nga iyang gibulsa ang kwarta. Giinsister ni Dico nga dili basta-basta usab ma-release ang kwarta kung dili kini magsubay sa guidelines sa Commission on Audit.

Apan matud pa ni Jumao-as, ilang giingnan si Dico nga dili nalang ipadayon ang maong beauty pageant kung wala’y klaro ang budget aron dili mabutang sa kauwaw ang pederasyon. (Garry Lao)   (BANATNEWS)