SC sa Mandaue gigahina'g P10M

CEBU, Philippines - Aprobado na sa konseho sa dakbayan sa Mandaue ang supplemental budget nga balor og P10 milyones alang sa mga senior citizen (SC).

Si Konsehal Emiliano Rosal nga maoy chairman sa committee on budget and appropriation sa konseho mibutyag sa Banat News nga ang maong kantidad ilang gipasukip sa P79 milyones nga Supplemental Budget No. 2 nga ilang giaprobahan.

Gipasabot ni Rosal nga ang P10 milyones nga kantidad bahinbahinon sa tag P200,000 matag chapter sa kahugpongan sa mga SC, ug P500,000 nga gahin alang sa pederasyon niini.

Dugang pa ni Rosal nga laing P2 milyones nga kantidad ang gigahin alang sa hospitalization sa matag SC sa dakbayan ug uban pa niining panginahanglan.

Si Rosal miingon nga nahilakip usab sa maong gahin ang ipamalit og tag-lima ka kilong de kalidad nga matang sa bugas alang sa mga SC. (Romeo T. Limpangog) (BANAT NEWS)