'Mongoloid' gi-rape sa chatmate

CEBU, Philippines - Usa ka menor de edad nga batang babayeng giingong ‘special child’ apan makamaong mo-chat ang gilugos sa iyang chat mate niadtong Miyerkules sa gabii sa milabay'ng semana diha sa kalibunan sa usa sa mga barangay sa dakbayan sa Talisay.

Ang suspetsado giilang si Warlito Diaz, 19, taga barangay Pakigne, lungsod sa Minglanilla mitahan sa ilang silingang polis niadtong Sabado sa buntag ug gitugyan diha sa Talisay City Police Station.

Si SPO1 Margienette Yosores sa Women and Children’s Protection Desk sa TCPS mibutyag sa Banat News kagahapon nga si Diaz usa ka kanhi rugby boy ug mag-estambayan diha sa sitio Mananga, Tabunok.

Ang biktima giingong na-impluwensiya sa mga barkada maong nakamao kining mag-chat sa internet diha sa ilang balay ug diha niini nailhan si Diaz.

Si Diaz ang gikatahong misulti ngadto sa biktima nga moanha sa ilang balay apan ang biktima mitubag nga “my parents are very strict” apan mga alas 6:00 sa gabii sa maong adlaw migawas sa ilang balay ang biktima ug dihang nakit-an ni Diaz diha sa gawas sa balay giguroy siya niini ngadto sa bakanteng lote nga kalibunan ug gilugos.

Ang biktima mitug-an kang Yosores nga dili siya makasinggit tungod kay gisampongan ni Diaz sa kamot niini ang iyang baba ug milampos kini sa dautang tinguha.

Si Diaz nasubay pinaagi gihapon sa chat dihang si PO2 Roy Lofranco gitudloan sa biktima. Wala hinuon siya maabti sa ilang balay apan mitahan kini sa silingang polis human makabantay nga mireklamo ang biktima.  - Brenda Batuto (BANAT NEWS)