Nag-ihaw og manok gipatay

CEBU, Philippines - Patay ang usa ka tawo human kini gitabangan ug pusil sa tulo ka mga tawo nga nagtaptap sa ilang dagway didto sa Sitio Kamangahan, Brgy. Pajo dakbayan sa Lapulapu sa milabay’ng gabii.

Ang biktima mao si Giovanie Aragones Regado, 32, ulitawo ug residente sa maong dapit samtang wala pa mailhi sa kapolisan ang tulo ka mga mamumuno.

Base sa imbestigasyon ni SPO2 Rolito Jumao-as sa Crime Against Persons sa kapolisan sa dakbayan sa Lapulapu nasayran nga mga alas 8:30 sa milabay’ng gabii samtang nag-ihaw og manok si Regado sa iyang tugkaran tulo ka mga tawo ang kalit mibutho sa iyang atubangan dayong pamusil.

Si Regado nga samaran sa nagkadaiyang parte sa lawas gidali og dala sa Vicente Sotto Memorial Medical Center apan gideklarar kini nga patay na sa mga mananambal.

Matud pa ni SPO2 Jumao-as naglisod og ila ang mga saksi sa maong hitabo gumikan kay nakamaskara ang mga mamumuno ug dali usab nga nakadagan sa nagkadaiyang direksiyon human sa maong krimen.

Nakuha sa kapolisan ang usa ka slug sa kalibre .45 nga bala ug laing slugs sa wala pa matinong kalibre sa bala nga gigamit sa mga mamumuno.

Usa sa anggulong ilang gilantaw mao ang panagsungi sa biktima ug mga responsable samtang padayon ang ilang pakisusi ug imbestigasyon alang sa pag-ila kanila. - Bong Soriano (BANAT NEWS)