Polis gipriso kay piniriso gibuhian

CEBU, Philippines - Polis nga sakop sa Sibonga Police Station gipapriso ni Sr. Supt. Jesus Gaquing Jr. pangulo sa kapulisan sa lalawigan sa Sugbu human gikatahong hubog ug gibuhian ang piniriso niadtong Domingo sa hapon.

Ang maong police giila ni Gaquing nga si PO2 Noel Rodriguez, jailer sa Police Station giingong mibuhi sa pinirisong si Junry Yamaro, 28, taga Barangay Bahay, Sibonga kinsa nag-atubang og kasong pagpanglugos sa Regional Trial Court (RTC) 28 sa Argao.

Gimandoan niya si Insp. Allan Rosario, hepe sa Sibonga Police Station sa pagpangita’g igong basehan nga mapa-priso gyud si PO2 Rodriguez.

“Akong gipatan-aw ni Insp. Rosario pinaagi sa iyang level nga siya na mismo mopapriso ni PO2 Rodriguez. Inmate out, policeman in,” sumala pa ni Gaquing.

Hasta si Insp. Rosario, ipaapil sa imbestigaron ni Insp. Ruben Cuizon, imbestigador sa Provincial Investigation and Detection Management Branch (PIDMB).

Si Insp. Rosario nga gikahinabi sa Banat News nagkanayon nga kagahapon sa hapon ilang gipasaka sa Provincial Prosecutors Office ang kasong Infidelity in the Custody of Prisoners batok kang PO2 Rodriguez ubos sa Art.223 sa Revised Penal Code ug isunod unya nila ang kasong administratiba.

Matud pa ni Insp. Rosario nga positibo sa liquor test si PO2 Rodriguez human ilang gipadala sa Carcar District Hospital apan dili kini hubog. Hinuon gibalhog gilayon niya sa ilang karsel human sa hitabo niadtong Domingo.

Sumala pa niini nga walay tarong tinubagan si PO2 Rodriguez dihang iyang gipangutana kun nganong iyang gibuhian gawas lang sa pagtubag nga nalooy siya sa piniriso tungod kay duna na kini nervous breakdown.

Giklaro ni Rosario nga si Yamaro way sakit nga nervous breakdown sanglit nahiling na kini sa doctor sa dayon niining pagkatanggong, nagtuo siyang nailad lang si PO2 Rodriguez sa drama sa maong piniriso.

Si SPO4 Rodelito Carillo, desk-officer sa Sibonga Police nga gikahinabi sa Banat News nagkanayon nga ang laing mga piniriso maoy nipahibalo sa ilang mga kauban nga nakagawas na si Yamaro. (Guam Logroño) ( BANAT NEWS)